Nagaland : FNR leh 24 Apex Naga Organizations ten meeting nei
Dimapur, Nagaland-a Chümoukedima-ah Thawhṭanni khan Forum for Naga Reconciliation (FNR) leh 24 Apex Naga Organizations ten meeting neiin, state inthlan neih hma ngeia Naga buaina chingfel tura sorkar laipui an phut thu an sawi.
He meeting-a resolution an pass zingah FNR leh 24 Apex Naga Organizations te chuan sorkar laipui chu Naga te buaina chinfelna kawnga hma la turin leh tikhawtlai lo turin an phut a, inthlanpui neih hma ngeia chinfel turin an ti bawk. Meeting hian Naga mi hmun hrang hranga awm mai bakah a ṭhenawm ramte chu an buaina chinfelna kawnga hma lak pui turin an sawm bawk.
Naga political issue chinfel a nih a, remna leh muanna a awm theihna turin pawl hrang hrang leh kohhrante chu hma la turi leh ṭawngtainaa hre reng turin an sawm a ni.
Naga buaina hi kum tamtak kalta aṭanga tawha inṭan tawh kha a ni a, tunhnaiah Nationalist Socialist Council of Nagaland (NSCN-IM) te chuan 'Nagalim' (greater nagaland), Naga mi te awmkhawmna tur an beisei a, he buaina kal zelah hian sorkar leh NSCN-IM te hian inbiakna pawh vawi eng emaw zat an nei tawh a ni. Kum hnih kalta khan sorkar leh NSCN-IM te hian inremna ruangam an siam a, hei hi tun thlengin mipuite hriatah tlangzarh a la ni lo a, mi tam tak chuan an sawisel nasa hle a ni.