Meghalaya-in ramria inkahna thleng central agency chhui tir a phut

Assam-Meghalaya ramria November 22 zinga inkahnaa mi paruk thihna thleng chu Meghalaya lam chuan central agency, National Investigation Agency (NIA) emaw, Central Bureau of Investigation (CBI) emaw chhui chian tir an phut.

Ramria buaina thleng vang hian Meghalaya cabinet chu Thawhlehni khan an ṭhukhawm nghal a ni. State home minister Lahkem Rymbui pawhin buaina thlenna hmun, Murkoh hmun chu a tlawh nghal bawk.

Ramria intihbuaina thlengah hian mi paruk an thi a, an zinga panga chu Meghalaya state mi niin, Assam forest official-te silai hmehpuaha thi nia sawi an ni. Assam forest official pakhat a thi tel ve bawk.

Meeting-a an rel angin, vawiin hian cabinet aiawhte hian union home minister hmuin, ramria Assam forest official-te silai hmehpuah leh buaina chhuak vanga mi paruk thih dan chu NIA emaw, CBI emaw chhui tir turin a ngen dawn.

Meghalaya sorkar chuan ramria buaina chhuaka nunna chan an awm chu pawi a ti takzet tih sawiin, heng nunna chante sun leh zahna lantir nan November 30 thleng chu sorkar official programme-te ṭhulh vek a ni. Hei bakah state chhung hmun hrang hranga festival hman mekte pawh ṭhulh vek a ni dawn bawk.

TMC hruaituin Assam sorkar lakah thubuai a thehlut
All India Trinamool Congress hruaitu, Saket Gokhet chuan November 22 zingaa Assam-Meghalaya ramria buaina chhuaka Assam Forest Guard-ten silai leh ralthuam dangte an hman chungchangah National Human Rights Commission (NHRC)-ah an party hmingin, Assam sorkar lakah thubuai a thehlut.

Gokhale chuan, "Assam forest official-ten ralthuam nei lo Meghalaya mite an beih let dan hi dan kalh a ni. He thil thleng hi rang taka chhui chian kan phut bakah, Assam sorkar hnenah pawh Meghalaya ram chhunga Assam forest mi leh sa awmte chu hnukkir nghal tura thupek ni rawh se," a ti.

Assam sorkarin thil thlen dan chhui chiang dawn
Assam sorkar chuan Mukhrow hmuna Assam forest official leh civil mite intihbuaina thleng leh, mi paruk an thih dan chungchang chhui chiang turin Gauhati High Court judge hlui a ruat. Inquiry panel hnenah hian thla thum chhunga report thehlut tura hriattir a ni.

West Karbi Anglong SP Imbad Ali pawh transfer nghalin, Jirikingding police station officer-in-charge Kajal Nath chu suspend a ni bawk. Buaina nasa chhuak palh thei venthawn thilah, Assam police-te chuan Meghalaya khawpui Shillong pana motor kalte chu an dang rih bawk.

Assam sorkar chuan ramria buaina chhuak vanga thi chhungte chu zangnadawmna, Rs nuai 5 ṭheuh a pek tur thu a puang.