Sorkar laipui chuan Arunachal Pradesh-a 2880 megawatt Dibang Hydropower Project atan cheng vaibelchhe 32,000 a pawm thuai dawn. 
He thu hi union minister for power R K Singh chuan Thawhlehnia Arunachal Pradesh deputy chief minister Chowna Mein nen an inkawmnaah a sawi a ni. Singh chuan central public sector undertaking (PSU) hnuaiah tualchhung ṭhalaite hna thawh tur remchang siamsakna turin theihtawp chhuah a ni dawn a, he project hi tualchhung miten an chhawr ṭangkai thei dawn a ni, a ti. 
Deputy CM Mein pawhin state sorkar chuan land acquition process a siamṭhat thu leh, ram neitute hnenah zangnadawmna pek thuai a nih tur thu a sawi ve bawk. 
Chowna Mein chuan Arunachal Pradesh-a hydropower project ṭha siam chuan prime minister Narendra Modi-a'n Glasgow COP-26-a India ram 'net zero emission' rama siam tuma hmalaknaa thu a sawi tih hlawhtlinna kawngah thui takin a pui dawn a ni, a ti. He project hi ruahmanna fel tak hnuaia kalpui a nih chuan, Arunachal chuan a hydro project hmang hian sorkar laipuiin target a siam 10% chu a lo pui thei dawn tih a sawi. 
 Mein chuan tun hnaia PM Modi-a'n a hawn tak, 600 MW Kameng Project aṭangin an state chuan kum khatah a thlawnin power, Rs vbc 150 hu a dawng thei dawn tih sawiin, 2000 MW Lower Subansiri pawh hman theiha hawn a ni thuai dawn a, hemi aṭang hian kumtin power, Rs vbc 400 hu a thlawnin an dawng dawn a, hei bakah hian local area tihhmasawnna atan Rs vbc 70 an dawng ṭhin dawn tih a sawi bawk. 
Meeting-ah hian project 20, MW 32,000 pe chhuak thei turte private sector kut aṭanga Central PSU in a tahtawla a lakchhoh dan turte an sawidun bawk a ni.