AP sorkarin APST candidate-te kum bithliah tisang

Arunachal Pradesh sorkar chuan Arunachal Pradesh Public Service Commission (APPSC) examination hmachhawn thei tura Arunachal Pradesh Scheduled Tribe (APST) candidate-te kum, kum 37 china a bithliah ṭhin chu kum 40-ah a tisang.

Chief minister Pema Khandu chuan Thawhlehni khan APST candidate-te tan kum bithliah tihsan a nih thu hi puangin, a hmain kum 35 china bithliah chu kum 37-ah an lo tisang tawh a, tunah kum 40-ah tihsan a ni leh ta a ni, a ti.

CM chuan tun hnaia APPSC-a question paper leak chungchang chu pawi a tih thu sawichhuak bawkin, state selection board-ah standard operating procedure (SoP) khauh zawk kalpui a nih tur thu a sawi.

A kaihhruai sorkar chuan eirukna chu na takin a do zel dawn tih sawiin, Chief Minister chuan, "Chief minsiter chuan hna pekna turin thuneihna a nei lo a ni maithei, mahse tihtawp sak tur erawh chuan thuneihna ka nei a ni," tiin dik lo taka hna lak chu a do zel tur thu a sawi bawk.

State sorkar hnuaia hnathawkte dearness allowance (DA)/dearness relief (DR) tihpun a nih thu pawh CM chuan a sawi a, kumin July 1 aṭanga hman tur khan DA/DDR hi 28% aṭangin 34%-ah tihsan a ni, a ti.