Air Deccan Thlawk chhuak turin a inpeih
Regional Connectivity Scheme (RCS) hnuaiah thawhtheihna chuan man tlawm 'Air Deccan' chu hmarchhakah thlawhtir tura tih a ni a, hemi tihlawhtling tur hian an inpeih twh thu official-te chuan an sawi.
Air Deccan hi December thla aṭang chuan mumal atak thlawh tir theih beisei a ni a. He scheme hi UDAN (Ude Desh Ka Aam Nagrik) tia hriat a ni a, hmun kil khawr zawkah inkalpawhna ṭha a awm theih nana hmalakna a ni.
Scheme hian mi pakhat tan thlawhtheihna chuan man hi Tier-2 leh Tier-3 khawpuiahte cheng 2,500 ni turin a ruahman a, sorkarin subsidy a pek dawn vanga chuan man hi tlawm a nih thu official-te chuan an sawi. Shillong Airport director MK Nayak chuan Air Deccan thuneitu lam chuan December 15 a thlawk chhuak thei tura ruahmanna an siam thu a sawi bawk.
Air Deccan thlawhchhuahna hmunpui atan hian Shillong hman a ni dawn a, Shillong aṭang hian hmarchhak hmun hrang hrang Agartala, Aizawl leh Imphal mai bakah Kolkata service pawh a awm dawn a ni.
Tun dinhmunah hian Alliance Air chiah Shillong leh Kolkata inkarah hian a thlawk a ni. Airport-in a mamawh oil refuelling facility pawh Oil India lam chuan an peih tawh bawk tih official te chuan an sawi.
Nayak chuan he thlawhtheihna service tur hian khualzin mite pawh nasa zawka a hip a beisei thu a sawi.