NRC list tihchhuah a nih chuan Assam-ah buaina a chhuak ang : Sorkar laipui

Sorkar laipui chuan Thawhlehni khan Su­preme Court hnenah Na­tional Register of Citizens (NRC) list a tihchhuah chuan Assam-ah buaina a chhuah theih thu sawiin, he list hi tihchhuah a nih chuan mi nuai chuangin India khua leh tui nihna an hlauh dawn a ni, a ti.

Apex court-in NRC draft update tura hun a pek chu December 31, 2017 thleng hi a ni dawn niin sawi a awm a, hei hi tihchhuah a nih chuan state chhunga dan leh hrai kenkawh mek a chawkbuai dawn niin sorkar laipui chuan an sawi.

Attorney General KK Venugopal chuan Assam NRC list update na atan hian hna hautak tak thawh a nih thu a sawi a, mi nuai tam tak chu NRC list-ah hian an tel dawn thu sawi mah se, mi nuai chuang zet chuan khua leh tui nihna an hloh thung dawn niin a sawi bawk.

Justice Adarsh Kumar Goel leh UU Lalit te thu­neihna bench-ah he thu hi thehlutin sorkar laipuiin list thar hi tihchhuah a nih chuan Assam chhungah buaina liamtham tak a chhuah a hlauhthawn thu a sawi bawk a ni.

Attorney General chuan buaina thleng thut thei venna atan hian sor­kar chuan hma a la tih a sawi bawk.

November 22 khan mi vaibelchhe 3.29 chu NRC list ah hian telh an nih thu apex court hi hrilh an lo ni tawh a, he thil hi dan lo a Assam a lut ru te zawnchhuahna tura tih a ni.

Sorkar laipui, state sorkar leh All Assam Students Union (AASU) te inremna siam chuan 1951 NRC list chu update turin thutlukna an siam a, apex court bench hrang hlak NRC update list siamna endik tur hian dah an lo ni tawh bawk.