Terrorist awm lohna state - Assam

Assam Chief Minister Sarbanada Sonowal chuan Thawṭanni khan Assam chu terrorist awm lohna "Terrorist-free" state a nih thu sawiin, dan leh hraiah buaina an tawh loh thu a sawi bawk.

Chief minister Sonowal chuan United Liberation Front of Assam (ULFA) chuan state chhungah eng­mah an ti thei tawh lo niin a sawi a, mipuite pawh­in ralmuang taka awm an thlang tawh a ni, a ti.

Sonowal chuan 'Ad­vantage Assam' roadshow-ah he thu hi sawiin sorkarin investors summit a buatsaih dawn thu a sawi bawk a, ramchhung bakah khawvel pum huap investor-te hip ngeina tur summit buatsaih an tum thu a sawi. Summit hi kumthar February 3 leh 4-ah neih a nih tur thu sawiin, state sorkar pawhin hei hi Association of Southeast Asian Nations (ASEAN) gateway atan hman ngei a tum tih a sawi bawk.

Sonowal chuan Chief Minister a nih chinah cheng vaibelchhe 6,500 hu invenstment an hmuh tawh thu a sawi bawk a ni.

Assam CM chuan ASEAN ramte chu consu­late office an state chhunga hawng tura an ngen thu sawiin, hei hian ram pa­hnihte nen inkalpawhna awlsam zawk a awm theih nan kawng a hawn a beisei thu a sawi a ni.