Arunachal Governor-in sipaiah Ṭhalai tam zawk la turin ngen

Arunachal Pradesh Governor BD Mishra leh Army Chief Bipin Rawat te chu tun hnai khan an inkawm a, Gover­nor chuan sipaiah ṭhalai tam zawk an ṭan theih nana hma lakpuiah a sawm.

BD Mishra chuan hna tam zawk siam nan leh ṭhalai tam zawkte India Army-a an luh theih nan Army Chief hnenah hian sipai lak hun pawh tun aia zing zawka kalpui a duh thu a sawi. Mishra chuan Rawat hnenah state chhunga hnathawk an tam zawk nan state sorkar leh sipai thuneitute ṭanrual a ngai a ni, a ti.

Governor chuan pre-recruitment training hmun pasarih - Bom­dila, Itanagar, Ziro, Aalo, Tezu, Likabali leh Jairampur-ahte buatsaih turin Rawat chu a ngen nghal bawk a, state chhunga ṭhalai tam tak chuan sipai nih an chak thu sawiin, pre-recruitment training an neih loh vangin mi tam tak chu sipaiah an ṭan theih loh thu a sawi.

Mishra chuan sipaia ṭang tura san zawng zat an bituk pawh ramri vela ṭhalai chengte tan chuan tihniam turin a ngen bawk a, ramria chengte hi a tlangpuia an tawi thu leh hemi a nih avanga sipaia lut thei lo an tam thu a sawi bawk a ni.