Assam-Meghalaya border : Police-te kha an insum thei tur a ni : Assam CM

Assam-Meghalaya ramri bula buaina chhuaka mi paruk an thih phahna chungchangah, Assam chief minister Himanta Biswa Sarma chuan Assam police-te kha hetiang khawp thil pawi thleng lo tur khan an insum thei tur a ni, a ti.

Ramria buaina thlen vangin, Meghalaya mi panga leh Assam forest guard pakhatin an thih phah chu pawi a tih thu sawiin, he thil thleng hi Assam police-te hian awmze nei loa silai an hmehpuah vang nia a lan thu CM Sarma chuan a sawi.

"Silai hmetpuah kher kha a ṭul loin a lang. Police-te khan dawhthei deuh se, mihring nunna hlu tak channa thleng kha pumpelh theih a ni ang," a ti.

Hemi rual hian Assam CM chuan West Jaintial Hills district, Meghalaya-a Mukroh khuaa buaina thleng chu ramri chungchang vang a ni lo tih a sawi nghal bawk. Assam sorkar chuan he thil thleng chhuitu tur a din tawh a, Assam police zingah thiam lo an awm a nih chuan hremna an pumpelh dawn lo tih a sawi.

Buaina a chhuah hnu hian Assam CM leh Meghalaya chief minister Conrad K Sangma-te pawh an inbe nghal a, Meghalaya CM pawhin ramri chungchanga buaina a ni lo tih a sawi ve bawk a ni.

Meghalaya CM Sangma kaihhruai cabinet member-te chuan Mukroh khuaa inkahna thlenga Meghalaya mi panga thi chhungte chu tlawhin, sorkarin zangnadawmna a pek Rs nuai 5 cheque an hlan. Nimin khan Meghalaya cabinet-te hian union home minister Amit Shah chu he thil thleng chungchangah hian hmuh an tum a, Assam chief minister pawh meeting an neihpui bawk ang.