AP-in school 200-ah Football Training Programme kalpui dawn

Arunachal Pradesh sorkar chuan state chhunga sorkar school 200-ah football training programme, 'Football for School' a kalpui dawn.

Education minister Taba Tedir chuan sorkar hmalakna tur hi sawiin, he programme hnuaiah hian naupang kum 6-13 inkarte chu football training pek an ni ṭhin dawn a ni, a ti. Union education ministry leh FIFA chuan naupangte zinga football chawilar leh zirtirna tura thawkdun turin memorandum of understanding (MoU) an lo ziah tawh thu a sawi.

Minister Tedir chuan, "State tinte chu hma lak dan tur ruahman tur hian tih an ni. Keini pawhin education leh sports department officer-te bakah, Arunachal Pradesh Football Association (APFA) member-te nen meeting neiin, ruahmanna hi kan siam a ni," a ti. An programme kalpuina turah hi union education ministry leh FIFA chuan an puih tur thu a sawi bawk.

Playground nei ṭha leh physical educaton teacher awmna school-te chu he programme kalpuina tur hian thlan an ni dawn tih Minister chuan a sawi. Naupang training pek tur, kum 6-13 inkar mi 50-100 awm tlinna chin chu duhsak an ni dawn tih a sawi bawk a ni.

APFA chuan he prog­ramme kalpuina hian hma a la mek a, December thlaah ṭan hman beisei a ni.

All India Football Fede­ration (AIFF) Treasurer Kipa Ajay chuan AP chuan school-a hetiang programme nei tur state hmasa ber a nih thu a sawi a, hei hi state chhunga football chu nasa zawka a chawilar ngei pawh a beisei thu a sawi.