Assam-Meghalaya ramri bula inkahna thleng chungchang Union Home Minister-in central agency chhui tir a tiam

Meghalaya chief minister Conrad K Sangma chuan Assam-Meghalaya ramri bula buaina thleng leh, Assam police-ten silai an hmehpuah chungchang chu union home minister Amit Shah chuan central agency-te chhui tir a tiam tih a sawi. He buaina chhuak vang hia mi paruk an thi a, an zinga panga chu Meghalaya state ami an ni a, Assam forest guard pakhat a thi tel bawk.

Ningani khan CM Sangma kaihhruaiin Meghalaya cabinet minister-te chuan New Delhi-a Amit Shah an hmu a, Mukroh khuaa inkahna thleng chungchang an sawipui a ni.

Meeting zawha press conference a neihah, CM Sangma chuan, "Home Minister leh sorkar laipui hnenah ramri bula inkahna thleng chungchang hi central agency, NIA emaw CBI emaw chhui tir tur leh, a thiam lote chu hremna pe ngei turin kan ngen a ni. Union Home Minster pawhin central agency-te chhuitir tiamin, hemi atan hian thupek pawh tihchhuah a nih thuai tur thu min hrilh a ni," a ti.

Sangma chuan tun ṭuma an buaina chu ramri chungchang vang ni lo mah se, he buaina thleng hian Assam nena ramri buaina an neihte chinfel tuma inbiakna an neih mek pawh a nghawng a, sorkar laipui pawh a inrawlh a ṭul a ni, tiin a sawi. Border area-a chengte himna ngaihtuah a ṭul thute pawh a sawi bawk.