Indian Navy biker team-in hmarchhak bialah expedition nei dawn

India ram zalenna kum 75 tlin lawmna, ‘Azadi Ka Amrit Mahotsav' peng pakhat atan Indian Navy Motor Bike team, Sea Riders chuan hmarchhak bialah motorcycle expedition an nei dawn a, state pasarih an tlawh ang.

Nimin zing khan expedition hi Guwahati aṭangin an ṭan a, chief of Naval Staff, Admiral R. Hari Kumar chuan video conference kaltlangin a vailiam.

Sea Riders-ah hian rider 31 awmin, an zingah hmeichhe officer pahnih an tel. Ni 24 chhungin km 3,500 chuang an tlan dawn a, December 15-ah Guwahati-ah kir lehin, expedition hi an khar ang.

Rider-te hian Indo-Bangladesh border-te tlawhin, Unakoti sculptures leh Keibul Lamjao National Park te an tlawh dawn, Nagaland-a Hornbill Festival pawh an chhim nghal ang. Guwahati, Shillong, Aizawl, Imphal leh Kohima-te an kaltlang dawn a, altitude sang tak Sela leh Bum La Pass pawh an paltlang dawn bawk.

Expedition neih chhungin rider-te hian school-te tlawhin, zirlaite hun an hmanpui dawn a, Indian Navy chungchangte an hrilhfiah ang. Hei hi ṭhalaiten Armed Force an zawm duhna atan cho phurna pakhat atan an hmang nghal dawn a ni.