Indian Army-in Assam police lak tharte training pe

Assam police-te thuam chakna turin police lak thar mi 2,700-te chu Indian Army-in training a pe.

Defence PRO, Lt Col Mahendra Rawat chuan tun kar tir lam aṭang khan Assam leh Meghalaya-a hmun pasarihah training hi pek an ni tih a sawi. Training hi thawh hnih- basic leh advanced-a neih a ni dawn a, kar 40 chhung training hi neih a ni ang. Lt Col Rawat chuan advance phase-ah police-te hi combat skill lam zirtir an ni dawn tih a sawi.

Army thupuangtu chuan Assam police-te hian kum 1990 chho aṭang khan hmarchhak biala boruak muanawm a awm theihna turin Indian Army-te chu an thawhpui nasa tih a sawi. Assam police-te nena joint operation an neihte chuan state chhung hmun tam takah boruak ralmuang a siam phah a ni, a ti.

Assam sorkar hian tun hnaiah police atan mi 2,700 la tharin, an zingah hian hmeichhia 300 chuang an tel. Police thuam chakna tur commando battalion panga a siam belh a ni.