NHRC-in Assam leh Meghalaya sorkar hriattirna pe

Meghalaya-a West Jaintia Hills-a Mukroh khuaa inkahna thleng chungchangah, National Human Rights Commission (NHRC) chuan Assam leh Meghalaya sorkarte hriattirna a pe a, hma an lak dan report thehlut turin a ti.

NHRC chuan Trinamool Congress-in complaint a thehluh behchhanin state pahnihte hi hriattirna a pe a, kar li chhung ngeia report thehlut turin a ti a ni.

November 22-a Assam-Meghalaya ramri bul, Mukroh khuaa buaina chhuakah khan mi paruk an thi a, an zinga panga chu Meghalaya state mi niin Assam forest guard pakhat a thi tel bawk.

TMC chuan buaina thleng hi Assam Forest guard-te Meghalaya ram chhunga dik lo taka an chetna chauh ni loin, scheduled tribe te lakah pawikhawihna lian tak a ni bawk a ni, an ti. Hei vang hian he thil thlengah NHRC chu inrawlh turin an ngen.

Ramri bula inkahna a thlen hnuah hian buaina liantham chhuak zui tawh lo mah se, Assam sorkar chuan Inrinni thleng khan private motor-te chu Meghalaya an luh a la khap. Police-te chuan Meghalaya state-ah zin rih lo turin state mipuite an ngen bawk a ni Commercial vehicle te erawh dan pangngai angin tlantir an ni thung.

Meghalaya pawhin Inrinni chawhma dar 10.30 aṭang khan darkar 48 chhung atan district pasarihah internet service a tihtawp chhunzawm leh bawk. Sorkar chuan social media leh messaging apps chu hmang sualin, buaina chawh chhuahna hmanruaah an hmang palh thei a ni, a ti.

Inrinni khan Hanniewtrep Indigenous Territorial Organisation chuan lungawi lohna lantirin 'Red Flag Day' an hmang a, Shillong-ah Assam leh Meghalaya chief minister-te lim an hal. Hynniewtrep Youth Council pawhin dik lo taka thiltitu, Assam mite man phutin Shillong-ah nawrh huaihawt an tum thu an sawi bawk.