District hospital ho thuam ṭhatnan Rs vbc 500 seng : AP CM

Arunachal Pradesh chief minister Pema Khandu chuan state chhung health infrastructure thuam ṭha turin sorkar chuan hma a la zel tih sawiin, district hospital hrang hrang thuam ṭhatnan cheng vaibelchhe 500 vel an seng tawh tih a sawi.

Chief Minister Khandu chuan Covid hri leng chu health infrastructure ṭha neih a tulzia hriattirtu a nih thu a sawi a, 'Hri lengah khan kan health sector that ṭawk lohzia kan hrechhuak zual a ni. Health infrastructure leh service dinhmunte kan han thlir khan min ṭhawng hle a ni. Hei vang hian sorkar chuan health delivery system chu tuaithar a, theithawp siamṭhat a, eng emergency ah pawh thlaphang loa kan awm theihna tura thuam chhoh a tum ta a ni,' a ti.

District hospital hrang hrangte thuam thar an ni a, an state-a hospital upa ber zinga mi, Pasighat-a Bankim Pertin General Hospital pawh khum 300 awm theihna turin tihlen a ni.

Khandu chuan, ' Kan hmalakna pawhin rah a chhuah ṭan mek.Nau piang hlim thi zat pawh 10% ah a tlahniam a, health sector lama thawktu indaih lohna pawh 33% atangin 6 % ah a tlahniam tawh bawk,' a ti.

State sorkar chuan CHC-te thuam ṭhat leh a tum chho mek a, hei bakah hian Aalo-a ANM School chu B.Sc nursing school-a hlangkai turin sorkar laipuiah ngenna pawh an thlen tawh tih CM chuan a sawi. An ngenna hi sorkar laipuiin a pawm veleh thuam ṭhat hna hi an thawk nghal dawn tih a sawi bawk.