Tripura : BJP worker-ten Congress party rally-a telte an bei

Tripura Congress party-in rally an neihna hmun pathumah BJP worker nia sawiten an bei a, mi panga an hliam.

Police-te chuan heng thil thlenna hmun hi West district-a Suryamaninagar, Sepahijala district-a Golaghati leh South district-a Santirbazar te a nih thu an sawi.

Congress party hian an party hruaitu, Rahul Gandhi-a'n Bharat Jodo Yatra a neih denchhenin, an state chhungah 'Tripura Bachao Padayatra' an lo nei ve a, km 1,200-a thui kal an tum a ni. Rally an neihna hmun ṭhenkhatah BJP mi leh sa nia sawite hian lungin an lo tawng a, an lo tibuai a ni.

Police-te chuan buaina thlengah hian mi panga an hliam a, motor ṭhenkhat a chhe bawk niin an sawi. Congress leh BJP hian buaina chawk chhuaktu zawkah inpuhin complaint an thehluh ve ve tih an sawi bawk.

Hetih lai hian Congress chuan an worker hliam zat hi 29 niin an sawi thung. Party hruaitu Asish Kumar Saha chuan DGP chu inrawlh tura ngenin, 'Police phalna neia kawng zawh hi buatsaih kan ni. Beih tawk mah ila kan kawngzawh hi kan chhunzawm zel ang,' tiin a sawi.