Assam-in Meghalaya-a zin khapna hlip

Assam sorkar chuan Meghalaya nena an ramri bula inkahna thleng vanga an state aṭanga Meghalaya zin a khapna chu ni ruk hnu, Pathianni aṭang khan a hlip.

Police-te chuan private motor pawh Assam aṭangin Meghalaya-ah an kal phalsak an ni tawh tih an sawi a, a ṭul chuan motor-te chu escort an ni ang, an ti. Buaina chhuah hlauhawm zualna hmunah chuan police duty tir an nih thu an sawi bawk.

Kar liam ta Thawhlehnia inkahna a thlen hnuah, Assam police-te chuan Assam mite Meghalaya-a zin rih lo tur tiin, commercial vehicle tih loh chu motor dang tlan luh an khap a ni.

Meghalaya kohhran hruaituten ngenna siam
Khasi Jaintia Christian Leaders Forum (KJCLF) chuan Pathianni khan ramri bula inkahna thleng chungchangah, state mipuite chu buaina tipunlun zawnga che lo a, inbengdai turin an ngen.

KJCLF Secretary Rev EH Kharkongor chuan thuchhuah siamin, state chhunga boruak ṭha a awm theihna atan sorkar pawh theihtawp chhuah turin a ngen a, inkahna thlenga thi chhungte an tuarpui thu a sawi bawk.

Assam-Meghalaya ramri bul, Mukroh khuaa inkahna thlengah hian Meghalaya mi panga leh Assam forest guard pakhat an thi a ni. Ramri-ah hian dan loa Meghalaya aṭanga thing phur luttu nia sawi truck chu Assam forest guard-ten an lo dang a, hemi hnu hian buaina chhuak zuiin Assam police-te koh an ni a, police-ten silai an hmetpuak zui a ni.

He thil thleng vang hian state chhung hmun hrang hrangah lungawi lohna lantir a ni a, Assam leh Meghalaya chief minister-te lim pawh an hal bawk.

State chhunga lungawi lohna lantir hian mipui nawlpui, a bikin exam nei mek zirlaite a nghawng thu sawiin, buaina tichhe zawnga che lo turin kohhran hruaitute chuan an ngen.