AP-ah Chakma leh Hajong-ten nawrh huaihawt

Aruanchal Pradesh-a Changlang district-a Diyun khuaah Pathianni khan Chakma leh Hajong hnam chuan resident proof certificates (RPC) tihtawp sak an nih avanga lungawi loin nawrh an huaihawt.

Diyun-a nawrh hi Chak-Hajong pawl hrang hrang telna, Joint Action Committee (JAC) hminga neih a ni. JAC-ah hian Chakma Rights and Development Organization, Committee for Citizenship Rights of Chakma & Hajongs of Arunachal Pradesh, Arunachal Pradesh Chakma Gaonburah Council, Arunachal Pradesh Chakma Students Union, Arunachal Pradesh Hajong Students Union, Chakma Women Welfare Society, Chakma National Council of India – Arunachal Pradesh leh Rashtriya Chakma Tribal Sangha-te an tel.

JAC chuan kumin December 15 hmain Chakma leh Hajong-te hnena RPC pek chu chhunzawm leh turin an phut. RPC thlakna atana ‘Temporary Settlement Certificates' siam chu Chakma leh Hajong-te hmusitnaah an ngaih thu sawiin, a thlakna atana an siam hi zirna leh hna laknaah residence proof anga ngaih a ni dawn lo a, thil awmze nei lo leh ṭangkai lo a ni, an ti.

"Temporary residence certificates chu Arunachal Pradesh-a lut tur, ILP mamawhte tana tih a ni a, hetih lai hian Chakma leh Hajong-te chu Arunachal Pradesh-a cheng nghet, ILP mamawh ve lo a ni. Chakma-te hi state-ah kum 58 chuang an cheng tawh a, RPC pekna tura a phut, kum 10 tal an cheng nghet tawh tih pawh an pha vek a, hei vang hian Chakma leh Hajong-te hnenah hian RPC hi pek leh a ni ngei tur a ni," tiin JAC chuan an sawi.

RPC tihtawpsak an nih chhan chu state sorkarin All Arunachal Pradesh Students Union (AAPSU) tihlawm a tumna mai a nih thu leh, hei hi court thupek bawhchhiatna a nih bakah, inthliarhranna lantirna, an dikna chanvo rahbehsakna a nih thu an sawi bawk.