Ramria sensitive area-ah border outpost siam dawn : CM Sangma

Assam leh Meghalaya inrina bul, Mukroh-a inkahna thlen vanga buaina a chhuah hnuah, Meghalaya chief minister Conrad K Sangma chuan state inri-naa sensitive area-ah border outpost siam a ni dawn tih a sawi.

Chief Minister Sangma hoin Thawhṭanni khan all-party meeting neih a ni a, he hunah hian Jaintia Hills-a MLA-te pawh an tel vek a ni. Mukroh-a thil thleng chungchanga sokarin hma a lak dante an sawiho a ni.

Meeting zawha thuchhuah a siamah, CM Sangma chuan sensivite area-ah border outpost eng emaw zat siam a nih tur thu leh, hemi chungchang hi cabinet-in an tihfel tur thu a sawi. "Ramri a him theihna turin a ṭul angin hma lak zel a ni ang," a ti.

Mukroh khuaa inkahna thleng chu a dem thu sawiin, Chief Minister chuan inkahna thlenga thite sunna hun hmangin minute hnih ngawi rengin an ding a ni. Sangma chuan political leader hrang hrangte chu boruak ṭha a awm a, state chhung buaina a thlen zui tawh lohna atana theihtawp chhuah turin a ngen bawk.

Meghalaya sorkar chuan Thawhṭanni aṭang khan Khasi Jaintia Hills region-a district pasarih huam chhunga mobile internet service a tihtawp pawh a sut tawh a ni. Hetih lai hian inkahna thlenna hmun leh a chhehvelah erawh CrPC Section 144 hman chhunzawm a la ni a, security lam pawh ṭhahnem tak duty tur an la a ni.

CM chuan Mukroh hmuna Assam police-te chetdan chu a dem thu sawi nawn lehin, hetiang hian police leh sorkar department dang pawh an che tur a ni lo, a ti. Murkoh khua chu 2011 report-ah pawh Meghalaya state huam chhung ngei a ni a, engmah sawi danglam theih a awm loh thu a tarlang bawk.

BJP-in Meghalaya Home Minister bang turin phut
November 22-a Assam-Meghalaya ramri bula inkahna thlenga Meghalaya mi pangain nunna an chan chungchangah, Meghalaya home minister Lakhmen Rymbui chu tih turte hlen loah puhin BJP chuan bang turin an phut.

BJP national secretary Rituraj Sinha chuan home minister Rymbui chu Jaintia Hills region mi a ni chungin state police-te dah danah Shillong khawpui chauh ngaih pawimawh a ni a, hmun danga chengte ngaihsak an ni tawk lo a ni, a ti. Hei vang hian minister chuan buaina chhuak chungchangah mawhphurhna la in, a duty a hlen zawh loh avangin a bang tur a ni, a ti.

Sinha chuan Meghalaya CM hnenah Mukroh-a inkahna thlenga thi chhungte zinga mi pakhat tal zel chu sorkar hna pe turin a ngen bawk.

BJP chuan Assam police-te chen dan chu a dik tawk lo a nih chaun Assam CM Himanta Biswa Sarma hnenah pawh a laka action la turin an ngen dawn tih a sawi. Vawiin Assam CM hi hmuh an tum a ni.