Meghalaya : Mukroh inkahnaa thi chhungte sorkarin hna pek tum

Meghalaya chief minister Conrad K Sangma chuan Assam nena an inrina bul, Mukroh khuaa inkahna thlenga Meghalaya mi panga thi chhungte chu sorkar hna pek tum an ni tih a sawi.

Chief Minister Sangma chuan Thawhlehnia cabinet meeting neih zawhah mitthi chhungte hna pek tur hi ngaihtuah mek a ni tih a sawi a, hemi rual hian cabinet meeting-ah erawh la sawiho a ni lo tih a sawi. Meeting-ah hian ramri hrula chengte himna tur chungchang bik ngaihtuah a ni, a ti.

State chhunga pawl hrang hrangten mitthi chhungte zángnadawmna pe tura sorkar an phut chungchangah pawh CM chuan sawichhuakin, sorkar chuan zángnadawmna pek zat tur a puan hmain dan ṭhenkhat tihfel phawt turte a nei a ni, a ti. Sorkar chuan mitthi chhungte hi a puih theih dan tur kawng a dap reng tih a sawi.

Assam Police-ten Mukroh khua tlawh
Assam Police-a special DGP (law and order) Gyanendra Pratap Singh kaihhruaiin Thawhlehni khan Assam police-te chuan Mukroh khua an tlawh a, Karbi Anglong Autonomous Council (KAAC) chief executive member Tuliram Ronghang-a'n a ṭawiawm a ni.

Special DGP chuan Mukroh khuaa thil thleng chu state pahnihte ramri buaina kaihhnawih a nih loh thu leh, dan loa thingzai tawlh chungchang zawk a ni, a ti. Forest department leh police-te pawh thingzai tawlh chungchang hi uluk taka chhuizui tura an hrilh thu a sawi bawk.

"Thingzai tawlhnaah hian Meghalaya mi inhnamhnawih an awm chuan Meghalaya police lamin hma an la zui dawn a ni," tiin SP chuan a sawi.

Assam chief minister Himanta Biswa Sarma thurawn angin, Mukroh khuaa inkahna thleng chungchang chu CBI chhui tir a ni dawn a, ni hnih khat hnuah an kuta hian case hi hlan a ni thei tawh dawn tih a sawi bawk.