Vice President-in Tripura a tlawh

India vice president Jagdeep Dhankar chuan Thawhlehni khan Tripura state a tlawh a, Vice President a nih hnua a tlawhna hmasa ber a ni.

Vice President hi a nupui Sudesh Dhankar nen Thawhlehni zing khan Maharaja Bir Vikram Airport, Agartala an thleng a, governor SN Arya, chief minister Dr Manik Saha, deputy CM Jishnu Dev Varma leh union minister of state social justice and empowerment-ten an lo hmuak.

Agartala an thlen hnuah Vice President leh a nupui hian Udaipur-a kum 700-a upa Tripureswari temple, Tripura Sundari tia sawi bawk chu an tlawh a, puja a hmang nghal a, minute 30 vel an awm, He temple-ah hian sakhaw hrang hrang zuitute chuan ṭawngṭai/puja te an hman thei a ni. Kum 1501-a Maharaja Dhanya Manikya din a ni.

Temple a tlawh hnuah Vice President hian Agartala-a Maharaja Bir Bikram College buatsaih New Horizons of Education seminar a hmanpui nghal a, India ram chu khawvela economy lian ram panga a nih tawh thu leh, khawvel huap pawhin India mite chuan zah an kai zel thu a sawi. India ram chuan dan rual lohin chak takin hma a sawn chho zel a ni, a ti. Seminar zawh hnu, tlai lamah Vice President hi Kolkata lamah a kir leh nghal a ni.