Vawiinah Hornbill Festival vawi 23-na hawng dawn

Nagaland-a vawiin aṭanga neih ṭan tur, Hornbill Festival vawi 23-na chu vice president Jagdeep Dhankar-a'n a hawng dawn.

Hornbill Festival hi ni 10 awh tur a ni a, Kisama-a Naga Heritage Village-ah hman a ni ang.

Festival hawnna inkhawmah hian governor Prof Jagdish Mukhi chu chief host a ni dawn a, chief minister Neiphiu Rio leh advisor to tourism minister Yepthomi chu host leh festival host a ni bawk ang. Honoured guest-ah India rama France ambassador HE Emmanuel Lenain, Trade Commissioner for South Asia & British High Commissioner for Western India Alan Gemmell leh Australian High Commissioner to India Barry O’Farrell Ao-te sawm an ni bawk.

Kum danga tih dan ṭhin angin, festival neihna main arena-ah hian 10 a.m - 12 p.m leh 1 p.m - 3 p.m-ah cultural peformance neih a ni dawn a, cultural troupe 18-ten traditional dance, song leh games-te an entir ang.

Kisama Heritage village-ah hian dawr 132 siam a ni dawn a, heng zingah hian MSME 100 an tel dawn. Eastern Nagaland Peoples' Organisation (ENPO) ten state hran an phut kal zelah Hornbill festival-ah tel loh an tum thu sawi mah se, state chhunga hnam hrang hrangte chu an inlan theih an beisei thu Yepthomi chuan a sawi. State cabinet pawhin ENPO hnenah hian Eastern Nagaland huam chhunga cultural troupe leh midangte chu festival-a tel phalsak tur hian a lo ngen tawh bawk a ni.