APPSCCE-2017 paper leak case-ah official 2 man belh leh

Arunachal Pradesh police-a Special Investigation Cell (SIC) chuan Arunachal Pradesh Public Service Commission (APPSC)-in kum 2017-a Arunachal Pradesh Public Service Combined Competitive Examination (APPSCCE) a buatsaiha question paper leak case-ah sorkar official dang pahnih an man belh leh.

SIC chuan official an mante hi PWD Liroboma division-a assistant engineer Yiter Rakshap leh Pangin PHE and Water Supply division-a junior engineer Mopin Sora-te an nih thu a sawi. SIC (vigilance) superintendent of police Anant Mittal chuan heng mi pahnihte hi Kesto Loriak leh APPSCCE-2017 candidate pasarihten FIR an thehluh bawhzuia man an ni tih a sawi bawk.

APPSCCE-2017 paper leak kaihhnawihah hian SIC chuan mi 22 an man tawh a ni.