BOP siam tum chungchang Meghalaya BJP-ten Assam CM sawipui

Meghalaya BJP MLA Sanbor Shujllai leh state party chief Ernest Mawrie kaihhruaiin, Meghalah BJP palaite chuan border outpost siam tum chungchang chu Assam chief minister Himanta Biswa Sarma an sawipui.

Nilaini khan BJP palaite hian Assam CM Sarma hi Assam Secretariat-ah an hmu a ni.

Assam CM hian Assam leh Meghalaya ramri bula Meghalaya lamin border outpost siam an tum chu dodalna an neih loh thu a lo hrilh niin an sawi.

November 22-a state pahnih ramri bul, Meghalaya lama Mukroh khuaa inkahna thleng chungchangah, Murkoh khaw mite chuan silai hmetpuaktu Assam security force-te chu hremna pek ngei an phut tih an sawi a, an thil phut chungchang pawh BJP palaite hian Sarma hi an hrilh bawk.

Assam CM chuan West Karbi Anglong SP chu sawn a nih bakah, police station OC leh forest officer-te pawh suspend an nih tawh thu a lo hrilh a ni. Assam police-te pawh Meghalaya ram china lut lo tura hriattirna pek an nih tawh thute a sawi bawk a ni.

Mukroh khaw mite hian an khaw bula Assam forest guard office sak pawh ṭhiat tura an phut chungchang pawh BJP palaite hian Assam CM hi an hrilh bawk a, Sarma pawhin a lo ngaihtuah tur thu leh, a ṭul anga thupek a tihchhuah a siam tur thu a hrilh a ni.