MLA ban vangin harsatna a awm lo : CM Sangma

State assembly inthlang tura inbuatsaih mek, Meghalaya-a rorel lai, National Peoples' Party (NPP) MLA pahnih leh Trinamool Congress MLA pakhat bangin, BJP an zawm dawn nia sawi a ni.

Chief minister leh NPP hotu, Conrad Sangma chuan thil danglam vak a nih loh thu leh harsatna a awm loh thu sawiin, inthlan dawn hnaihah MLA-te chuan an ṭan lam an thlak fo niin a sawi. NPP MLA pahnih bangte chu duhsakna hlan zuiin party dang hmingin an chuh zui thei dawn a ti. NPP erawh chuan hei hian a tibuai lo a, inthlan neih tura atana inbuatsaihin hma lam an pan zel dawn tih a sawi.

Meghalaya assembly inthlan hi nakkum kumtir lamah neih a ni ang.

BJP hruaitu Alexander Hek chuan NPP MLA leh TMC MLA bangte hian an party an zawm dawn tih sawiin, kum 2023 assembly inthlanah BJP chuan MLA double-digit a nei pha tawh dawn a ni, a ti.

MLA 3 an ban tak avangin seat 60 awmna Meghalaya assembly-ah hian member 57 an awm ta a ni. NPP chuan MLA 21 neiin a thawhpui UDP-in pariat, PDF-in pali, BJP-in pahnih leh HSPDP-in pahnih leh IND-in pasarih an nei. Eptu pawl TMC chuan MLA 11 neiin, KHNAM leh NCP in pakhat ve ve an nei a, independent MLA pakhat a awm bawk.