Dibrugarh University-a ragging thleng vangin zirlai 4 hnawtchhuak
Dibrugarh University, Assam-a intihduhdahna, ragging thleng vangin zirlai pali chu Nilaini khan hnawhchhuah an ni tih University thuneitute chuan an sawi.
He university-a junior student, Anand Sharma chu tihduhdah a tawh nasat avangin in chhawng hnihna aṭangin a zuang thla a, hliam na tak a tuar a ni. He thila mawhphurtu senior student pali chu hnawtchhuah an ni. University chuan campus chhungah ragging thleng chungchang chhui chiang tur leh, hetiang thil a thlen tawh lohna tura hma la turin member panga awmna committe a din tawh bawk.
Assam chief minister Himanta Biswa Sarma pawhin police-te hnenah hostel superitendent chu chhui chiang turin a hrilh.
Ragging tawktu, Anand Sharma hian a hmain zirlai ṭhenkhatin an tihduhdah thu hi Unversity thuneitute hnenah thlenin, November 17 khan hostel warden hnenah ziakin a thehlut a, zirlai hming 10 pawh a ziaklang a, mahse thuneitute lam hian an ngaihven zui lo nia sawi a ni. Sharma hi damdawi-inah awm mekin zai a ngai dawn a, mahse a ngaihtuahawm lo nia sawi a ni. Dibrugarh University chuan a enkawlna senso hi a tum vek ang.
University registrar Dr Paramananda Sonwal chuan Anti-Raging Committee (ARC) rawtna thlen angin, zirlai pali hnawhchhuah an nih thu a sawi , "Kum thum chhung chu India ram khawi hmunah pawh eng university-ah mah admission an ti thei dawn lo a ni," a ti.
Diburgarh police-te chuan Nilaini khan university-a ragging thlenga inhnamhnawiha puh zirlai pakhat an man leh bawk. Officer-in-chare Raju Bahadur Chetry chuan mi panga an man tawh tih a sawiin, hostel superintendent pawh Dubyajyoti Dutta pawh CrPC section 41(A) hnuaiah thu zawhfiah tura koh a nih thu a sawi.