Assam-ah Covid-19 kai 64 an awm
Assam-ah Thawh-ṭanni khan coronavirus kai mi pahnih hmuh belh leh an ni a, anni nen hian Assam-a Covid-19 kai hmuh tawh hi mi 64 an tling tawh.
Health minister Himanta Biswa Sarma chuan, Guwahati-ah mi pahnih hri kai hi hmuh belh an nih thu sawiin, hetihlai hian hri kai enkawl zinga mi panga chu Thawhṭanni vek khan damdawiin aṭangin chhuah tir an ni tih a sawi. Hri kai enkawl dam tawh hi mi 39 an awm a, mi 22-te enkawl mek niin, hri kai zinga pakhat chu Bihar lama enkawl tura a haw thu a sawi bawk.
Minister chuan Guwahati khawpuiah hri kai hmuh belh zel an nih avangin khawpuia chengte chu theihtawpa fimkhur turin a chah a, sorkarin hri darh zel tur venna atana dan a siamte zawm ṭha turin a ngen.
Sarma chuan, "Guwahati-a cheng, hmun danga zin chhuak lo zingah pawh hri kai hi hmuh an ni a, hei vang hian khawpuia chengte hi an fimkhur zual a ngai a ni," a ti.
Thuneitute chuan Guwahati-a Fancy Bazar-a MS Road chu containment zone-ah an puang nghal a,
Thawhṭanni tlai aṭang khan he hmuna Guwahati Municipal Corporation market pawh khar nghal a ni bawk.
Tripura-ah hri kaipahnih awm belh
Thawhṭanni khan Tripura-a BSF sipai pahnih chu Covid-19 an kai tih hriat belh leh a ni.
Tripura-a hri kai hmuh tawh zat hi mi 154 an tling tawh a, an zinga pahnih chu enkawl dam an ni tawh a ni.
Chief minister Biplab Kumar Deb chuan Dhalai district-a Ambassa-a BSF camp-a awmte leh khawchhunga civil mite test runpui neih sak an nih leh hnuin,s pahnih hian hri hi an kai tih hriat belh a nih thu a sawi. Mahse an state-a hri kai zingah ngaihtuahawm an awm lo niin a sawi bawk.
CM chuan hri kai hmuh thar leh an nih hnuah theih anga tam sample test zui a nih thu sawiin, hmarchhak state zingah test neih tam ber an ni a, ram pumah pawh a pangana an ni pha tih a sawi a ni.