Hornbill Festival vawi 23-na ṭan a ni ta ; ENPO hnuaia Hoho hnam 7-te an tel lo

Ni 10 awh tur, Nagaland-a Hornbill Festival vawi 23-na chu Ningani khan Kohima aṭanga km 12 vela hla, Naga Heritage village Kisama-ah neih ṭan a ni ta.

He festival-ah hian an state khawchhak lam biala Frontier Nagaland state din phuttu, Eastern Nagaland Peoples’ Organisation (ENPO) hnuaia tribal Hoho hnam pasarih - Chang, Konyak, Khiamniungan, Yimkhiung, Sangtam, Phom leh Tikhir-te chu an tel ve lo. Hei hi Hornbill festival-a an tel loh vawi khatna a ni. Heng hnam pasarihte tana hmun an siamte chu luahtu awm loin a ruak a ni. ENPO leh Eastern Nagaland Women Organization (ENWO)-te ngenna angin an hnam thuam, incheina leh hnam thil dangte pawh Kisama-ah hian pholan a ni lo.

Festival-ah hian India vice president Jagdeep Dhankar chu khuallian niin festival hi a hawng a, a hun hman tawha ropui ber zinga mi niin a sawi.

Kisama-a festival hawnna inkhawm neihah hian tel an ṭhahnem hle. Chief minister Neiphiu Rio chuan an statehood day vawi 60-na nen an inrual avangin tun ṭum festival chu an tan thil chhinchhiah tlak a nih thu a sawi. Festival chu Nagaland nihna tilangtu a ni tiin, a tum ber chu Naga-te culture leh tradition phochhuah leh chawisan a ni, a ti. Festival chhimtute chu an vaiin state tana ambassador ni nghal turin a ngen bawk.

'Festival of festivals' tia an sawi bawk ṭhin, Hornbill Festival hi Nagaland sorkar buatsaih niin, state chhunga tribal hnam hrang hrangte'n inpawhna ṭha leh, Naga culture chawilarna atana a tih a ni. Kum telin ramchhung hmun dang leh ram pawn aṭangin festival chhimtu hi an pung chho zel a ni.