Hmarchhaka ramri buaina hrang hrangah Assam mawhphurtuah puh

Meghalaya Nationalist Congress Party (NCP) MLA Saleng Sangma chuan hmarchhak-a state ramri buaina hrang hrang awmah Assam state chu mawhphurtuah a puh.

NCP MLA Sangma chuan Assam chuan a ṭhenawm state-te chu ramri chungchangah buaina a neihpui vek a ni, a ti. "Assam chuan state pakhat chauh ni lo, state dang zawng zawng pawh harsatna a siam vek," tiin Shillong-a chanchinthar lakhawmtute a kawmnaah a sawi.

Tun hnaia Meghalaya-a Mukroh khuaa inkahna thleng chu Assam leh Meghalaya ramri buaina kal zelin a hrin chhuah a ni a, hei chauh ni loin hetiang bawk hian kum 2020-ah Langpih hmunah buaina chhuakin, Assam ramri bula bial dangahte pawh buaina a chhuak fo a ni, a ti. November 22-a Mukroh khuaa inkahna thlenga mi paruk thihnaah Assam thuneitute chu mawhphurtu an ni tih a sawi bawk. "Assam lam chuan Indian vek kan ni tih an pawm takzet chuan ṭul loha harsatna an siam ṭhin tur a ni lo," a ti.

Mukroh khua chu ramri buaina an neihna bial chhunga awm pawh a ni lo tih sawiin, NCP MLA chuan Meghalaya sorkar chu buaina chhuaka inhnamhnawihte chu hremna pe vek turin a phut a ni.