AP CM-in Covid testing machine pe turin PM ngen

Arunachal Pradesh chief minister Pema Khandu chuan state danga tangkhangte hruai haw ṭan an nih avangin, prime minister Narendra Modi hnenah state-a hawte lo endik zel an nih theihna turin Covid-19 testna tur, TrueNat machine chu a rang thei ang bera pe turin a ngen. 

Thawhṭannia PM leh CM-ten video conference an neihnaah Pema Khandu chuan hei hi sawiin, hripui leng avanga hmarchhak bial sum dinhmun a tlakhniam dawn avangin heng harsatna sutkianna tur kawng khat atan investment pawh ti chhun­zawm zel turin Modi chu a ngen nghal bawk. 

Conference zawh hnuah Khandu chuan hmun danga tangkhang hruai hawte chu test neihpui vek an tum thu sawiin, hei vang hian PM hnenah  Indian Council of Medical Research (ICMR)in a pawmpui, TrueNat testing machine chu pe tura a ngen thu a twitter-ah a tarlang. 

TrueNat hi tuberculosis testing machine a ni a, mahse ICMR chuan coronavirus test nan a pawm a ni. He khawl hmanga test, positive erawh chu method dang hmanga test nawn leh tur a ti thung.