Tripura MBB Airport-ah foreign exchange counter siam dawn

Hmarchhak biala airport lun ber dawttu, Tripura khawpui Agartala-a Maharaja Bir Bikram (MBB) airport-ah ram dang pawisa thleng theihna tur, foreign exchange counter siam a ni dawn tih airport official chuan a sawi.

MBB Airport hi Bangladesh aṭanga khualzin rawn lut zinga 30% vel chuan khawpui dang - Kolkata, Chennai, Bangalore leh Mumbai panna atan an hmang a ni.

Airport director KC Meena chuan, " Airport huamchhunga foreign exchange counter siam chungchang hi union minister Pratima Bhoumik hoa advisory committee meeting-ah sawiho a ni," a ti. Hei hi a bikin Bangladesh aṭanga khualzin rawn lutte avanga siam tum a nih thu sawiin, Agartala-Chittagong inkara international flight service tir na tura hmalakna pawimawh tak a ni tel nghal dawn tih a sawi bawk.

Meena chuan, "Civil aviation ministry chuan MBB airport aṭanga international flight service phalsak turin home leh finance ministry hnenah pawh ngenna a siam tawh. Customs team pawhin ramdang mi khualzin lutte buaipuina tur hmunte enfiahin airport pawh hi an lo tlawh tawh a ni," a ti. Agartala leh Delhi inkara direct flight awm zat pawh tipung tura ngen a nih thu a sawi bawk a ni.