Manipur sorkar hnuaia hna laknaah tualchhung ṭawng thiam duhsak dawn

Manipur chief minister N Biren Singh chuan sorkar hna laknaah, tualchhung ṭawng thiam hnemte chu dah pawimawh an ni ang, a ti.

Department of language planning & implementation-in Imphal-a "Two months local language training programme of seven languages" a buatsaih hawnnaah CM Singh chuan thu sawiin, tualchhung ṭawng hrang hrang thiamte duhsak an nih tur thu hi a sawi a ni. Ṭawng hrang hrang zir chu thil ṭha tak a nih thu leh, ṭawng an thiam chuan hnam hrang hrangte chu inhriatthiam tawnna neiin, an inngaihtuah tawn phah dawn tih a sawi.

Chief Minister chuan mipuite hnenah naupangten mobile phone chu zirna lama an ṭangkaipui theih leh, an thiamna tihpunna lam atan chauha an hman theihna tura khuahkhirhna siamsak turin a chah bawk.

Education minister Basantakkumar pawhin thu sawiin, ṭawng chungchanga Chief Minister hmalakna chuan hna hrang hrangte inpawhna ṭha zawk a siam dawn a ni, a ti.

Sorkar hmalakna hnuaiah hian mi 280 (ṭawng hrang hmang aṭangin mi 40 zel) chu thla hnih chhung state chhunga ṭawng chi sarih - Meitei, Tangkhul, Poumai, Rongmei, Anal, Paite leh Thadou zirtir an ni ang.