Assam : AIUDF hotu Ajmal-a'n thupha a chawi

AIUDF hotu leh Assam Lok Sabha MP Badruddin Ajmal chuan Hindu-te chungchang a sawi danah thupha a chawi a, a thusawiin inhnialna nasa tak a chawk chhuak chu pawi a tiin zahthlak a ti hle tih a sawi.

Thupha a chawi rual hian Ajmal chuan a thusawi chu an her kual sak a, eng sakhua bik emaw beihna lam hawia sawi a nih loh thu a sawi nghal bawk.

AIUDF hotu hian kar liam ta Zirtawpni khan media house-in a kawmnaah Muslim-te pung chak dan chungchang an zawhnaah Muslim-te anga Hindu an pun chak loh chhan hi a sawi a ni. Muslim-te chu sorkarin nupui/pasal neih a phal chin, mipa km 22 leh hmeichhia kum 18 chinah nupui/pasal an nei mai ṭhin a, hetih lai hian Hindu-te chuan kum 40 thlengte fa nei duh loin, dan ang taka an nupui ni si lo, mi pahnih pathum kawpin nuam an chen zawk a ni, a ti. Hei bakah Assam chief minister Himanta Biswa Sarma-a'n 'love jihad' chungchang a sawi chu a chhang let bawk.

Ajmal-a thusawi hi Inrinni khan party hrang hrangten sawiselin, sakhaw inkar inhuatna chawk chhuak thei a nih thu an sawi. Assam Jatiya Parishad (AJP) chuan state chhung hmun hrang hranga police station-ah complaint an thehlut a, BJP thupuangtu Ranjib Sarma pawhin Ajmal thusawi dan aṭang chuan hmeichhiate chu bungrua ang lekah a ngai a ni, a ti. Assembly-a leader of opposition, Congress party hruaitu Debabrata Saikia chuan hmeichhiate leh sakhaw dang chungchanga a sawidan mai bakah, chief minister chungchanga a thusawi dan avangin police-ten Ajmal lakah thubuai an siamsak a ngai niin a sawi bawk. Trinamool Congress chuan Guwahati-a an party office kawtah Ajmal lim an hal bawk. Party thupuangtu Dilip Sharma chuan Hindu leh hmeichhiate chungchang a sawi dan chu an ngawihpui mai dawn lo tih a sawi.