Rising People's Party-in Nagaland-ah Presidents Rule puan phût

Nagaland-a kum 2021-a political party din thar, Rising People's Party (RPP) chuan an state sorkar chu kawng hrang hranga tehin hnathawk ṭha lo ber niin an sawi a, hei vang hian prime minister chu an state-a Presidents rule puan tir turin an ngen.

Kar liam ta Zirtawpni khan PM Modi-a hnenah petition thehlutin, RPP president Joel Naga leh vice president Vitho Zao chuan Nagaland-a Presidents rule puan duha signature campaign an neihah mi 3,446 an inziaklut niin an sawi a ni.

Petition-ah hian Nagaland sorkar hnuaiah eirukna a hluar a, sum enkawl dan dik tawk lo, sorkar inrelbawl dan ṭha lo, hmasawnna awm lo leh public fund dik lo taka hmanna a thleng reng a ni, an ti. Kum 2021-a NITI Aayog-in SDGI index a tihchhuahah, tehfung hrang hrang (poverty, health, affordable energy, sustainable cities, industries and infrastructure) ah Nagaland chu dinhmun chhe ber state a nih thu an sawi.