Hallongi Airport siam tum hlawhtlin hmel : AP sorkar

Arunachal Pradesh sorkar chuan Ningani khan thuchhuah siamin, Itanagar bul Hallongi-a greenfield airport siam tuma ruahmanna awm chu a hlawhtlin hmel thu a sawi. Hemi chungchang ngaihtuah a nih aṭangin thil a kal tluang hle ni a ni, a ti.

Ruahman dan tak chuan airport siam nan hian Karsingsa thlan a ni a, mahse Director General of Civil Aviation (DGCA) leh Airports Authority of India (AAI) te chuan helai hmun hi duh lo in hmundang zawng turin an tih thu Urban Development Minister Nabam Rebia chuan a sawi.

Minister chuan an duhthlan theih dang la awm chu Hallongi a nih thu leh helai hmun chungchangah pawh inhnialna tam tak a awm tih a sawi bawk.

State sorkar in a ngen angin central joint inspection committee te chu airport siamna tura an ruahman hmun chu zirchiang turin an kal a, Hallongi-ah hian airport chu siam turin rawtna an thlen a ni.

Rebia chuan state cabinet lam chuan July 18 daih tawh khan Hallongi-a Greenfield Airport siam tura Central Technical Committee in a rawtna chu an pawm tawh thu a sawi.

Minister chuan Central Technical Committee rawtna leh state cabinet in an pawmpuina chu Civil Aviation ministry, DGCA leh AAI hnenah an hriattit tawh thu a sawi bawk. AAI team chu ni ruk cham turin Ningani khan Arunachal hi an thleng tawh a, Hallongi hmunhma hi an enfiah dawn a ni.