Dibrugarh University ragging case-a mawhphurtu ber police kutah inpe

Dibrugarh University, Assam-a zirlai tihduhdahna, ragging thleng chungchanga mawhphurtu bera puh, Rahul Chetry chu nimin zing khan Tinsukia district-a Lekapani police-te kutah a inpe.

University-a commerce department-a first semester zirlai, Anand Sharma chu senior student-ten an tihduhdah nasat avangin November 27 khan PNGBO hostel-a chhawng hnihna aṭangin a zuang thla a, hliam na tak tuarin damdawi-inah enkawl mek a ni.

Dibrugarh additional superintendent of police, Bitul Chetri chuan Rahul Chetry hi Lekapani police-te kuta a inpek hnuah Dibrugarh police station-ah thu zawhfiah tura hruai nghal a ni tih a sawi. He thil thleng kaihhnawihah hian Chetry bakah mi dang panga man a ni tawh tih a sawi bawk.

Rahul Chetry chuan November 27-a Anand Sharma chunga thil thleng chu pawi a tih thu leh a dam ṭhat leh thuai a duhsak thu sawiin, he thilah hian inhnamhnawihna a nei lo a, mahse case ziahluhah a hming a lan avangin mipuite kut tuar hlauin hun eng emaw chen a biruk hnuah police kutah a inpe ta tih a sawi. He thil thleng hi uluk taka chhui chian a, dik taka rorel a nih ngei a beisei thu a sawi.

University chuan zirlaipui tiduhdahtu mi palite chu a hnawtchhuak tawh a, kum thum chhung chu India ram eng university-ah mah admission an ti thei dawn lo a ni.

Anand Sharma hian tihduhdah a nih ṭhin chungchang hi a hmain hostel warden hnenah a hriattir a, mahse hmalakna engmah a awm lo. Hei vang hian boys hostel-a warden pathumte pawh suspend an ni bawk.