AP-ah mini food park siam a ni thuai dawn : CM Khandu

Arunachal Pradesh chief minister Pema Khandu chuan an state-ah mini food park siam a ni thuai dawn tih a sawi.

Chief Minister Khandu chuan mini food park hi Upper Subansiri district-ah siam a nih thu thu sawiin, food park hian horiticulture leh agriculture lam an tharchhuah pawh a tihpun phah thei dawn tih a sawi bawk.

Pathiannia Upper Subansiri district-a Dumporijo-a vantlang inkhawmah thu sawiin, CM chuan horticulture leh agriculture lama district chhung mipuite hmalakna hrang hrangte a fak a, hemi rual hian ṭhalaite chu mahnia eizawnna, sumdawnna lam kawngte ngaihtuah tura chahin, sorkar chuan a theih angin a puih zel tur thu a sawi.

CM Khandu leh union law minister Kiren Rijiju-te chuan Pathianini khan Upper Subansiri district-ah PMGSY hnuaia road leh bridge project eng emaw zat an hawng nghal bawk. Chief Minister chuan hmasawn hna thawhna atan sorkar lam aṭangin fund a awm reng tih a sawi a, hemi rual hian hna thawh erawh a ṭha tawk tur a ni, a ti. Project hrang hrang thawhna turah hian ram neitute nena harsatna awm thei tur chu chingfel hmasa vek turin district thuneitute a chah. Developmental project hrang hrang thawhnaah fund dik lo taka hman a awm leh awm lohte enfiah zel a nih tur thu a sawi a ni.