PAPPM-in Kuki helpawl nena inkahhai puan titawp turin ngen

Manipur-a civil organi­sation, People’s Alliance for Peace and Progress, Manipur (PAPPM) chuan sorkar laipui leh Manipur sorkarin Kuki helpawl pahnih, United People’s Front (UPF) leh Kuki National Organisation (KNO)-te inkahhai puanga inremna an siampui chu titawp turin an ngen.

Kum 2008, August 22 khan sorkar laipui leh Manipur sorkar chuan UPF leh KNO-te hi suspension of operation (SoO) inremna an ziahpui a ni. An inremna ziah hi a tawp hnuah pawh sorkar chuan an pawtsei zel a ni. Kum 2008 vek khan Zomi Revolutionary Organization (ZRO) chu hetiang inremna hi an lo siampui tawh bawk.

SoO inremna an siam sut leh tura an phut thu sawiin, PAPPM chuan inremna pawhsei zel chu Manipur tan chauh ni lo, ram pum security atan pawh a him lo niin an sawi. Helpawlte hian SoO an siam hi remchangah hmangin, an kaihhruaina hnuaiah poppy chinna te an siam a, Myanmar mi leh sa an la lut ṭhin niin an sawi. Hei bakah SoO an ziah hnuah Myanmar aṭanga ruihhlo tawlhruk pawh a hluar phah niin an tarlang bawk.

PaPPM chuan KNA/KNO leh ZRA/ZRO-te SoO agreement ziahpui chu Manipur leilung fa dik takte duh dan ang a ni lo tih sawiin, "Remna leh muanna a awmna tura hmalakna chu kan duh reng a, mahse Manipur state-a piang leh seilian hruaitute nen ngeia sawiho tur zawk a ni," tiin heng helpawl hruaitute chu Manipur-a piang leh seilian ni loin, Myanmar ram nena inzawmna neite an nih thu an sawi.