Framework Agreement in Naga mi zawng zawng a huam tur a ni : SC Jamir

Nagaland Chief Miniter hlui, Odisha Go­vernor ni ta SC Jamir chuan Inrinni khan thu­chhuah siamin Frame­work Agreement chuan Naga mi zawng zawng a huam tur a ni, a ti.

Naga helpawl, Na­tionalist Socialist of Nagaland (NSCN-IM) leh sorkar laipui chuan 2015 August thla khan Naga political issue chinfel nan Framework Agreement hi an ziak a, President Ram Nath Kovind chuan Zirtawpni khan hemi chungchanga thutlukna hnuhnung ber an thlen ṭep tawh thu a sawi bawk a ni.

Hun rei tak buaipui tawh Naga political issue chinfelna tura sorkar laipui hmalakna chu fakin, Jamir chuan NSCN-IM mai bakah political group dang paruk inbiakna a neihpui avang pawhin a fak thu a sawi.

Hornbill Festival hmanna hmuna reporter te zawhna chhangin Jamir chuan, buaina chinfelna sawi hian Naga mi zawng zawng a huam tur a ni, a ti. Jamir chuan inremna chu Nagaland mite leh sorkar laipui ten an pawm dun ngei tur a ni, a ti bawk.

Naga buaina hi kum tam tak kaltaa inṭan tawh ni mah se chinfel hleih theih a la ni lo a, sorkar laipui leh NSCN-IM te pawh hian vawi tam tak inbiakna an nei tawh a ni.

2015-a Framework Agreement an ziah pawh hi vawiin thleng hian puanzar a la nih loh avangin mi tam tak chuan nasa takin an sawisel a ni. Naga political issue hi Naga pawl tam tak chuan kumthar inthlanpui hma ngeia chingfel turin sorkar laipui hi an nawr ve bawk a ni.