Official kidnap chungchangah Hel pawla tel ṭhin mi 6 man

Tripura Gramin Bank (TGB) official pali kidnap chungchangah hel pawla tel ṭhin mi paruk chu Tripura hmun hrang hrangah man an nih thu Tripura official thuchhuah chuan a tarlang. Hetih lai hian bank official an kidnap te hi Zirtawpni khan chhuah an ni tawh thung.

Police official chuan an thudawn bawhzuiin Inrinni khan hel pawla tel ṭhin, kum rei vak lo kalta a Police te kuta inpe ta te chu bank official pali te kidnap thubuaia inhnamhnawih nia an hriat avangin an man tih a sawi. An zinga pahnih hi Tripura Khowai district-a Mungiakami khuaah an man a, Gomati district-a Amarpur khuaah pahnih dang hi an man leh bawk. Pahnih dang erawh hi chu Agartala-ah an man thung a ni.

Agartala-a an mi man te kut aṭang hian motor, mobile phone set leh pawisa fai cheng nuai 1.35 an man tel thu Police te chuan an sawi.

Heng an mi man tak te hi Gomati district local court-ah Pathianni khan kalpui an ni a, bank official te hmaah hian TI (test identification) parade an conduct dawn bawk.

Bank officail pali te hi November 24 khan Teliamur aṭanga Agartala pana motor-a an haw laiin man an ni a, Ningani zan khan anmahni man tute kut aṭang hian chhuakin Zirtawpni khan an chenna in ṭheuh an thleng a ni. An mi man zinga chhungkaw hnihte hian an chhungte hi chhuah an nih theih nan helho hnenah hian Rs 51, 000 an pe hman a ni.