Meghalaya CM-in 'FOCUS+' scheme hnuaiah fund Rs vbc 30 sem a ni

Meghalaya chief minister Conrad K Sangma chuan Thawhṭanni khan state sorkarin scheme, 'FOCUS+' hnuaiah chhungkaw 60,000-te hnenah fund, Rs vbc 30 a sem.

Programme hi West Garo Hills district-a Jengjal-ah neih ani a, official-te chuan Meghalaya state-a direct benefit transfer lian ber a nih thu an sawi.

‘FOCUS+’ hi state chhunga loneitute tana siam a ni a, Meghalaya-a loneitute welfare programme ‘FOCUS’ (Farmers Collectivization for Upscaling Production and Marketing System) huang zauhna atana tih a ni. Heng scheme pahnih hmang hian state chhunga loneitu chhungkua chu sum lama puihna, Rs 10,000 pek an ni.

Chief Minister Sangma chuan a kaihhruai sorkarin loneitute chu a dah pawimawh reng tih sawiin, FOCUS scheme kaltlanga an zinga tam takin hamṭhatna an dawng thei chu lawmawm a tih thu a sawi. FOCUS leh FOCUS+ Programme kalpui chhunzawm zel chu an duhthusam a nih thu sawiin, chhungkaw nuai 4.5 te hnena pek theih an tum tih a sawi.

Rural Backyard Piggery Scheme, ‘PROGRESS’ hnuaiah vawk vulhtute chu vawk no pathum pek niin, chhungkhaw 500 hnenah sem a ni. Chhungkaw 100 hnenah ar vulh tur, Kuroiler sem a ni bawk. He scheme hmang hian chhungkhaw harsa zawk mi 10,000 te chu ran vulhna tura ṭanpuina hi pek a, state chhunga vawksa leh arsa tam zawk a awm theihna tura hma lak tum a ni.

CM chuan Meghalaya Farmer’s Day pualin loneitute chu duhsakna a hlan a, sum an pek chu loan ni loin grant a ni tih a sawi bawk a ni.

CM-CAREs scheme tlangzarh
Chief minister Sangma chuan Thawhṭanni vek khan SICPAC Multipurpose Hall, Mawkiasiang, Shillong-a ‘State Convention of Frontliners’ a hmanpui a, sorkar hmalakna thar CM-CAREs (Comfort, Assist, Respect, Empowerment) scheme a tlangzarh nghal bawk.

CM-CAREs scheme hmang hian sorkar chuan senior citizen leh hmeithai, kum khata Rs 36,000 la lut tling lo leh rualbanlote chu ṭanpuina a pe ṭhin ang. CM Social Assistance Scheme tia sawi ṭhin, he scheme hnuaiah hian thla tin ṭanpuina Rs 500 pek ṭhin chu kumin October thla aṭanga hman turin Rs 750-ah tihpun a ni. CM-CAREs hnuaiah he ṭanpuina hi senior citizen 65,777, hmeithai 36,222 leh rualbanlo 14,227 te hnenah pek an ni.

CM chuan malnutrition-free Meghalaya siam tumnaa Anganwadi worker leh village organistation-te hnathawh chu a fak bawk a, kumin October 1 aṭanga hman turin Anganwandi worker-te lawmman chu Rs 1,500, mini AWW lawmman Rs 750 leh helper-te lawmman chu Rs 500-ah tihpun a nih thu a puang bawk.

State chhunga Anganwadi centre zawng zawng chu Early Childhood Development Centre-ah siam chhoh vek a ni dawn tih Chief Minister chuan a sawi a, "Structure, infrastructure leh methodology ṭha zawk nena thuamin, nu leh pate tan pawh training pek ṭhin a ni ang," a ti.