Manipur : Chief Minister-in Wangkhei Eye Hospital a hawng

Manipur chief minister N Biren Singh chuan Thawhṭanni khan Imphal East-ah Wangkhei Andro Parking-a Wangkhei Eye Hospital a hawng.

Chief Minister chuan Covid-19 hripui len aṭang khan health sector lamah infrastructure leh thawktu ṭha neih a pawimawh zia a lan thu sawiin, hri leng pawh an thawhhona ṭha leh inlungrualna vangin an paltlang thei tih a sawi. Sorkar chuan private, sorkar leh PP model-te chu infrastructure ṭha leh changtlung zawk ngai pawimawh tura a fuih tur thu sawiin, Jawaharlal Nehru Institute of Medical Sciences (JNIMS)-a Cancer hospital siam mek nakkum February-ah hawn hman tum a ni, a ti. OPD erawh chu kalpui a ni tawh tih a sawi.

CM chuan state chhung hmun hrang hranga infrastructure lama an hmasawnnate sawilangin, district tinah oxygen plant leh ICU khumte dah ani a, district pathum - Churachandpur, Chandel leh Tamenglong hospital-ah 24x7 solar power supply a ni tih a sawi bawk.

Singh chuan healthcare lama hmasawnna nei tur chuan hospital tihchangtlun ringawt a ni lo a, thawktu indaihzai zawk an awm a, infrastructure hrang hrangah pawh hmasawnna a awm a ngai a ni, a ti.