‘Tripureswari’ tea brand chawi larna turin MoU ziak

Tripura Tea Development Corporation Ltd chuan an thingpui siam, 'Tripureswari' tea brand chawi larna turin North Eastern Regional Agricultural Marketing Corporation Ltd (Neramac) chu thawhpuina tur inremna a ziahpui.

Memorandum of Understanding (MoU) an ziahah hian Neremac hian state chhunga a outlet pathumah Tripureswari tea hi an zuarchhuak dawn a, a hnu zelah pawh state pawn lamah zawrhchhuah a ni ang tiin TTDCL chairman Santosh Saha chuan a sawi.

Santosh Saha chuan thingpui siam sa hi an ngah tawk a, Neremac hnena Tripureswari tea supply-na turah pawh buaina a awm dawn lo tiin a sawi. Saha chuan thingpui tui leh ṭha, marketing ṭha zawk an buaipui mek thu sawiin, thla 12 chhungin North Tripura-a Machmara tea estate-ah manufacturing plant thar siam a nih tur thu a sawi bawk. Tun thlaah plant siamna tur lungphum hi phum a ni dawn a, project thawhna atan hian Rs vbc 3.5 vel ruahman a ni a, TTDCL chu contract hi pek a ni. Tribal Welfare department chuan project thawhna atan hian Rs vbc 1 a pe tawh a ni.

TTDCL hian tea estate panga leh manufacturing unit pahnih a nei mek a, kum khatah thingpui kg nuai 8 vel an siamchhuak ṭhin. Tripura state hian kum khatah thingpui a siamchhuah hi kg nuai 90 vel a tling a ni.