Bank Official kidnap chungchangah Police-ten mi 9 an man tawh
Tripura Gramin Bank official pali te kidnap an nih chungchanga thubuai kal zelah police te chuan mi pakua an man tawh thu Pathianni khan an sawi. An mi man te kut aṭang hian cheng nuai 38 an hmuh let thu an sawi bawk.
Gomati District Additional Superintendent of Police (ASP) Nabadwip Jamatiya chuan Inrinni zan thleng khan mi pakua an man tawh tih sawiin, Agaratala-a Krishnanagar area leh Khowai district a Mungiakami area-ah heng mite hi an man thu a sawi.
Misualte hian an mi mante tlanchhuah nan hian cheng nuai 65 an ngiat a, mahse cheng nuai 50 pek an nih hnuah bank official te hi Ningani khan an chhuah a ni. An mi kidnap pali - Gramin Bank branch manager Tanmoy Bhattacharya (30), Assistant Manager Sujit Dey (28), staff Raktim Bhowmick (31) leh Subrata Debbarma (32) te hi November 24 khan Teliamur aṭanga Agartala pana motor-a an haw laiin man an ni a, Ningani zan khan anmahni mantute kut aṭang hian chhuakin Zirtawpni khan an chenna in ṭheuh an thleng a ni.
An mi kidnap zinga mi Raktim chuan nitin an birukna an thlak thu leh thingkungah te thlung betin ramhnuaiah ke in thui tak tak an kal tir thu a sawi.
Kidnap-naa inhnamhnawih an man te hi hel pawla tel ṭhin deuh vek an ni a, Pathianni khan an zinga paruk te hi man hmasak an nih avangin Gomati District Local court-ah hruaiin TI (Test Identification) parade pawh bank official te hmaah hian an nei dawn bawk a ni.