NSCN-IM ten Commander-in-Chief thar nei

Nationalist Socialist of Nagaland - Isak Muivah (NSCN-IM) te chuan In­rin­ni khan Lieutenant Ge­neral Anthony Ningkhan Shimray chu Commander-in-Chief thar atan ruat a nih thu an tarlang a, NSCN-IM hotu thar hian charge pawh a la nghal a ni.

Charge hlanna in­khawm-ah hian NSCN-IM Vice President Gene­ral (rtd) Kholi chuan Army Chief kalchhuak tur Lt. General Phungthing Shimrang chu a inpekna leh Naga mite tana a hnathawhte avangin a fak a, Shimrang hian November 28 khan a term a hmang zo a ni.

NSCN-IM pawhin an thuchhuah siamah Lt. Gen. Phungthing Shim­rang chu Naga tana a inpekna leh a hnathawh te avangin an fak a, Lieu­tenant General Anthony Ningkhan Shimray chu Shimrang thlaktu tur a nih thu an tarlang.

"Vawiin December 2, 2017 hian Longvibu charge a lak rual hian Krista, Naga Flag leh Naga Army Flag te chu a nunna thapa vawnghim turin thu a tiam a ni. General headquarters-ah ṭawngṭai leh lawm tak chungin charge hi a la a ni", tiin NSCN-IM te chuan Shimray-a'n charge a lak tawh thu an chhuah.

September 27, 2010 khan Ningkhan Shimray hi Indo-Naga political talk a a tel tur Bangkok aṭanga Delhi lam a panna lamah Indian Agency, NIA ten Kathmandu-ah an kidnap a, October 3, 2010 khan court-ah hruai niin kum nga jail tang tura tih a ni. August 2016 khan jail aṭang hian rawn chhuak in NSCN Political Commissar-ah ruat a ni a, Ato Kilonser Advisor atan ruat a ni bawk a ni.

NSCN-IM te chuan hruaitu thar hnuaiah chak taka hma lak theih an in beisei thu an sawi.

NSCN-IM leh India sorkar hian August, 2016 khan Framework Agreement an ziak a, tun thlenga an inremna an la tlangzarh loh avang hian mi tam tak chuan an sawisel nasa hle a ni. President Ram Nath Kovind pawhin Zirtawpni kalta khan Framework Agreement an siam chu a hmawr an bawk ṭep tawh niin a lo sawi tawh bawk.