Meghalaya Power Minister a bang

Meghalaya Power Minister Comingone Ymbon-a chuan minister aṭanga a ban thu Thawhṭanni khan a puang a, Chief Minister Mukul Sangma chu mahni thu duh lutuk leh rorelna mahni chauha kalpui tumah a puh.

Comingone Ymbon-a'n a ban thu a puannni hian Chief Minister Mukul Sangma leh Meghalaya Pradesh Congress Committee President D.D Lapang te chuan New Delhi aṭangin Shillong an thleng ve chiah a ni. New Delhi-ah hian Congress president atana Rahul Gandhi an thlawpna lantir tura kal an ni. Ymbon chuan Chief Minister lakah rinna a hloh tawh avanga minister a nihna aṭanga bang a nih thu a sawi. August 4 khan Power Minister atan hian lakluh Ymbon chuan "Thla li minister ka nih chhung khan chief minister thu duh zia ka hmu a, ka department chanah pawh thutlukna a siam zel a, minister ka nih hian eng nge awmzia a neih?" tiin zawhna a zawt a, Congress party pawh a chhuahsan dawn thu a sawi.

Power Minister banna hi Megha­laya Congress tan chuan channa nasa tak a ni a, kumthar February-ah inthlanpui an hmachhawn dawn mek laia an mi pawimawh takin banna a thehlut leh ta hian Congress Party dinhmun a ti derthawng hle a ni. Hetih lai hian December 8 aṭang hian Meghalaya Legislative Assembly vawi 9-na, ni thum awh tur an nei dawn bawk.

Raliang Assembly consti­tuency-a Congress Legislator vawi hnih lai lo ni tawh Comingone Ymbone hi inthlan lo awm turah hian National People's Party tan a din rin a ni.

Thla khat kalta lawk khan independent legislator pahnih Robinus Syngkon leh Rophul Marak te chuan Congress an thlawp na aṭanga an inhnuhdawh thu an lo sawi tawh bawk.

Congress legislator pali Rowell Lyngdoh, Prestone Tynsong, Sni­awbhalang Dhar leh Ngaitlang Dhar te bakah Independent legislators Hopeful Bamon leh Stephanson Mukhim te chu kumthara inthlan awm turah hian NPP tan an din rin a ni bawk.