Tripura-ah firfiak pawl awm lo : DGP
Tripura Director General of Police (DGP) Kumar Shukla chuan Pathianni khan thuchhuah siamin, Tripura state chhungah firfiak pawl pakhatmah mumal taka kal an awm tawh loh thu a sawi. Ram ṭhenawm Bangladesh-ah erawh firfiak pawl hotu ṭhenkhat an biru niin a sawi thung.
Tun hnaia Tripura Gramin Bank official pali kidnap an nih chung changah pawh firfiak pawl pakhatmah an inrawlh lo niin a sawi. Bank official te hi November 24 khan misual pakhatin an kidnap a, mahse November 30 khan an mi man chhungte hnen aṭanga cheng 50,000 ṭheuh an hmuh avangin chhuan leh an ni. DGP chuan heng mi kidnap tute hi firfiak pawl ni loin hel pawla tel ṭhin, kum rei lote kaltaa bansan tate an nih thu a sawi a ni.
Mi pali kidnap tute hi man an ni tawh a, an vaiin mi 9 an man tawh a, an kut aṭang hian cheng nuai 48.85 man tel a nih thu DGP chuan a sawi. United Forums of Bank Union chuan Tripura Police te hi lawmthu an hrilh tawh bawk.
Kumar Shukla chuan hetiang thil a sawi mek lai hian National Liberation Front of Tripura (NLFT) hel pawlte chuan sorkar laipui nen remna zawnga an inbiak mek thu an lo sawi ve bawk a, hemi a nih avanga hma la rih lo mai an nih thu an sawi.
Police official-te chuan kum 2015 aṭang khan Tripura-ah hian firfiakte chetna hnuhma hmuh tur a awm tawh lo niin an sawi a, hemi hma kum 40 vel kha chuan Tripura chhungah hian firfiakte hian nasa takin pawikhawihna an lo thlen tawh thung a ni.
Hetih lai hian police leh intelligence official te chuan kumthar inthlanpui lo awm turah hian firfiakte hian chet lak an tum leh ngei an rin thu an lo sawi tawh bawk a ni.