Shillong Chamber Choir-in Covid-19 warrior chawimawi

Shillong Chamber Choir chuan Covid-19 kaite thinhrikna awm ṭhin tihreh a nih a, hri kai ngeite pawhin midangte an fimkhur theihna turin an hri kai zep lo tura fuihna atana Covid-19 a kai thu puangzar a, amah hnaihtute pawh fimkhur tura chahtu Meban Wa­hlang an chawimawi. 

Meban Wahlang hian July 25 khan a Face­book-ah coronavirus hi a kai thu sawiin, a hma Pathianni aṭanga amah lo hnaihtute chu inkhung hrang a, an sample test tura a ngenna thu a ziak a ni. Amah pawh a fimkhur thu leh,  hlauhthawn tur a awm loh thu pawh a ziak lang bawk. A thu post avang hian fak a hlawh hle a, contact a lo neih tawhte pawhin awlsam taka inhre nghalin, hma an la zui thei nghal a ni. 

Shillong Chamber Choir chuan  huaisen tak leh midangte an entawn tura Meban Wahlang hmalakna chu fakawm an tih thu sawiin, SCC official page-ah Meban chawimawina pualin hla, 'Make me a channel of your peace' tih chu an dah a ni. Duhsakna hlanin, Wahlang chu an ṭawngṭai sak reng thu SCC founder Neil Nongkynrih chuan a sawi bawk. Wahlanga'n Covid-19 a kai thu a puan hnuah hian, a tihdan entawnin  Laitumkhrah-a pet clinic-a thawk, Shianivia Wahlang pawhin Covid-19 a kai thu hi a social media account-ah a puang ve bawk a ni.