Nagaland-a mi pali thihna chhan Covid-19 vang tih finfiah

Nagaland health and family welfare department chuan Thawhlehnia hri kai pangate thihna chhan chu enfiah a nih hnuah an zinga pali chu Covid-19 vang a ni tih sawiin, pakhat erawh chu he hri vanga thi a ni lo tih a tarlang. 

Thawhlehni khan Dimapur-a hri kai panga an thi tih report a ni a, an zinga pahnih chu Dimapur District hospital-a awm niin, Dimapur Paid Quarantine centre, Dimapur Nikos Hospital leh Medzhiphema CHC-a awm pakhat ṭheuh an ni bawk. Mahse health department chuan heng mi pangate thihna chhan hi enfiah a nih hnuah, Dimapur Paid Quarantine centre-a awm hmeichhe pakhat chu Covid-19 vanga thi a ni lo tih a sawi a ni. 

Nagaland-ah hian Thawhlehni khan hri kai hmuh thar mi 75 awm lehin, hri kai hmuh tawh hi mi 1,460 an tling tawh. Hri kai hmuh thar zinga mi 32 chu armed force mi leh sa an ni a, frontline worker 10 an awm bawk. Hri kai mi 1,460 hmuh tawh zingah hian armed force mi leh sa 463 leh frontline worker 58 an tel tawh a, state dang aṭanga haw mi 871 an tel bawk a ni.