Kuminah Dimapur-Kohima inkar 4-lane peih hman dawn : Gadkari

Union minister for road transport & highways, Nitin Gadkari chuan Dimapur-Kohima inkar km 14.94-a thuia 4-lane road project thawh chu kumin chhungin zawhfel hman a ni dawn tih a sawi.

Nitin Gadkari chuan hemi chungchang hi a twitter-ah tarlangin, Nagaland state chuan kuminah Dimapur - Kohima Road (Package-I) chu a thawk zo dawn a, he project hi Rs vbc 387 man a nih thu a sawi. He project hian Nagaland leh Manipur inkalpawhna ṭha zawk a siamsak mai bakah, hun hman pawh tam takin a tihtlem phah dawn a ni, a ti.

Kumin September thlaa state assembly session-ah khan Nagaland chief minister, Neiphiu Rio chuan kum 2003, October thlaa khatih laia prime minister Atal Bihari Vajpayee-a'n a lo puang tawh, four-lane road project chu siam zawh theih lohin a la awm reng thu a lo sawilang tawh a ni.

Dimapur-Kohima road project package I zawhfel hun tura ruahman hi 2019, September 15 kha a ni. Mahse PWD (NH) chuan khaw chin ṭha tawk lo vang te, hmanrua awm ṭhat tawk loh vang te, leimin leh Covid khuahkhirhna siam vangtein package-I leh package-II hna thawh hi a bahlah niin an sawi.